الطفل المصرى أذكى طفل فى العالم لحد ميدخل المدرسه
ياتاره دى حقيقه ولا أشاعه لتسوئ صوره التعليم المصرى ؟؟؟
الحقيقه دى حقيقه ومؤسفه كمان
الطفل وهو صغير بيبقى فى كميه ذكاء مش طبيعيه وده بغض النظر عن العوامل الوراثيه والظروف البيئيه وخلافه
أول مبيدخل المدرسه بيصطدم بواقع تانى
أنا فاكره أنى لما كنت صغيره كان أخواتى فى مدارس وأكبر منى بكتير فكنت بعد مع ماما وهى بتذاكرلهم ولما كانت بتسألهم على قاعده فى الرياضه كنت أنا الى بسمعها مش هم غير أنى كنت بحب أفك وأركب الحجات
أول مدخلت المدرسه جالى مكروب العته والبلاهه الى بيعانى منه كل طلبه مصر تقريبا ربنا وعدنى بحتت مدرس رياضه خلانى لو شفت كلمه رياضيات مكتوبه على حيطه أغير الشارع كله
فعلا وصلنى لمرحله أنى كنت بعانى من الرياضيات طول عمرى لحد موصلت الجامعه ساعتها ربنا كرمنى والعقده أتفكت
البروفيسير ده بقى كان بيتبع معانا أسلوب الفلكه والنار يعنى الى يسأل يزعقله والى ميسألش يتريق عليه وياسلاااااااام بقى على مستواه فى شرح المعلومه كان متجمد ياعينى
بجد أنا الى يحكمنى على ده وأمثاله ححكم عليهم بالأعدام رميا بالبلغ فى ميدان عام علشان يكونوا عبره لغيرهم من الى بيقتلوا روح الأبتكار والفهم فى أبنائنا وبيحولوهم لحاسبات ذات مساحه تخزينيه عاليه الحفظ
تانى معاناه ليا مع الحفظ وخلافه لما دخلت الجامعه كنت ناويه أبدأ بدايه جديده وأرفع شعار المخ يكسب منا دخلت كليه عملى بقى خلاص يعنى كليه ساده العقول مش ساده العضلات
بس للأسف أصطدمت بالواقع المر لتانى مره
مناهج دش رقم واحد ومفيهاش كلمه واحده عملى ..مره عملت فيها فستوكه(كنايه عن الفستكه وفستوك يتفستك فهو متفستك-حد فاهم حاجه-) وسألت دكتور معلش يعنى يا دكتور هو أيه فايده الكورس ده ممكن أسٍتخدمه فى أيه فى حياتى العمليه
قالى يابنتى مش كل حاجه بتخديها حتستخدميها ولما ألحيت قالى معرفش
بذمتكم دا كلام بقى طالب الجامعه الى فاضله زلطه ويطلع بره يعد يدرس حجات ملهاش لزمه كده
وأكتشفت حاجه تانيه
أن الى بيفهم فى الكليه دى بيتبهدل أخر بهدله ومبينجحش أو بيتخسف بتقديره الأرض وبيبقى حجه الدكاتره لما طالب يحل بفهمه(أنتم حتألفوا علم من دماغكم أنتم تكتبوا الى أحنا قلناهلكم بس)دا على أساس أننا حنحفظ الملازم بحروف الجر
والعجيب بقى أنى لما بقيت صميمه زي مهما عايزين ربنا كرمنى وبقيت بجيب تقديرات(لحد دلوقتى)
بذمتكم دا كلام
دا حال 99% من طلبه مصر (1% سلم بالقضيه ومقضيها أستيميشن ودش) يعنى خلاص العالم فاضله زلطه ويدخل العصر النووى وأحنا لسه بندرس نيوتن قال أيه سنه ألف سبعميه وحبه لو مكنش قبلها
حرام بجد
ياعالم أًصحوا
فوقوا
بلاش السلبيه وكل واحد يقول وأنا مالى
أنتبهوا للتعليم شويه
النهارده أحنا حاسبات ذات قوه تخزينيه عاليه
بكره حنبقى أيه صناديق كارتون بتتحط فيها الكتب
وعجبى
هناك 3 تعليقات:
اولا:دمك زى العسل انا ضحكت للركب
ثانيا:طبعا التعليم ف مصر اقل حاجه تتقال انه حشو اكنك بتجيبى كوسه وبتحشى بعنف(وكفايه عشان الواحد حيجوع)انا فى هندسه بقالى عقد من الزمان ووقعدت كتير ف الكليه بسبب موضوع الحشو ده والحفظ الغببى والمناهج ال اطول من نهر النيل نفسه.بس بعد طول معاناه وصلت لاخر سنه الحمد لله بس بعد ايه.كرهت الكليه والعلم وكلمه مهندس نفسها.انا مش جاى اقلبها نكد بس فعلا ربنا يستر عل شبابنا من بعدنا.اصلا مفيش مخ كله حفظ حتى الكسور بقا ليها اله حاسبه والموبيل نفسه فيه اله حاسبه انا ال كان الموبيل عل ايامى قنبله ذريه.يلا الحمد لله ومبروك يمها عل الموقع الجامد ده
مشكلتك يا أحمد أن دماغك نضيفه زياده عن اللذوم ومش بتاع صم
بجد ربنا يطلعك على خير من الكليه يابشمهندس
الله يبارك فيك وعقبال بتاعك
page to7faaaaaa ya meshmesh ... gamda awii awii
إرسال تعليق